|
26.09.2010 Sieg im erschte Spiu
Dr Chrigu isch mitemne Sieg idi nöji Saison gstartet. Thun het Lyss nie chönne fordere u het ersch churz vor Schluss dr Ehreträffer erziut. Dr Chrigu isch mitemne Assist ure 2-Minute Straf i sini zwöufti 1. Liga Saison gstartet.
24.09.2010 Chrigu startet morn idi nöji Saison
Morn startet dr Chrigu mitem SC Lyss idi nöji 1. Liga Saison. Im starch verjüngte Team isch är mit 29gi dr Teamsenior.
25.02.2010 Lyss startet mit Uswärtssieg i Haubfinau
Dr SC Lyss het ds erschte Spiu vor Haubfinauserie gäg Wiki mit 2:1 nach Penoutyschiesse gwunne. Nach 80 Minute isches 1:1 gstange und im Penoutyschiesse hets nur grad 1 Träffer für Lyss gä düre Lars Murkowsky.
19.02.2010 LYSS IM HAUBFINAU!!
Nachem Sieg im Penoutyschiessä z’Zuchwiu het dr SC Lyss dr erst Matchpögg zum 3:0 Sieg gäg Zuchu usgnützt. Di früechi Füehrig vo Lyss hei d’Gäscht zwar no chönne usgliche, aber nachem 2:1 und 3:1 sisi zu keirä Reaktion meh fähig gsi. Jitz trifft de Chrigu mit Lyss im Haubfinau uf Wiki.
14.02.2010 YES, THEY CAN!!!
Äs geit auso doch no. Nach harzigem Start und ämne 0:2 Rückstand nach 40 Minute erkämpft sich dr SC Lyss dank ämne 4:0 im letschte Spiuabschnitt dr Startsieg ide Playoff- Viertufinau gäg Zuchwi!!!
10.02.2010 Füfti Niederlag i Foug
Dr SC Lyss verlürt ou ds letschte Masterroundspiu. In Matten verlürt dr Chrigu trotz eim Gou und eim Assist mit 4:7. Ide Playoff träffe d’Lysser jitz uf Zuchwil.
04.02.2010 Lyss git 2. tabäuerang ab
Eis Spiu vor de Playoff verlürt dr SC Lyss dr zwöit Tabäueplatz a Wiki. Mit dr 1:6 Niederlag gäg Huttwiu het Lyss jitz füf mau in Serie verlore. Ds letschte Spiu vor Masterround hei d’Lysser am Samschtig gäge SCUI, auerdings isch mä uf Schützehiuf vo Burgdorf Agwise, faus dr zwöit Platz wet zruggeroberet wärde.
30.01.2010 Burgdorf-Lyss 6:3
Dr SC Lyss fingt ou im Uswärtsspiu z’Burgdorf nid zum Siege zrügg. Zwar isch Lyss mit 2:0 i Füehrig gange, aber dr Gastgäber het im Mittuabschnitt chönne usgliche. Churz vor dr zwöite Pouse het de Lyss erneut chönne vorlege u het ds Spiu eigentlich im Griff gha. Was aber ide letschte 10 Minute isch passiert chame scho fasch aus unerklärlich betitlä. Burgdorf het innerhaub 8 Minute ds Spiu vom 2:3 zum 6:3 kehrt. Zwöi Spiu vor Schluss betreit dr Vorsprung uf ds dritt platzierte Wiki nume no grad 2 Punkt.
27.01.2010 Dritti Niederlag in Foug
Ou gäge SCUI het Lyss nid zu ihrer Qualiform chönne zruggfinde. Zwar ischme ou hie mit 1:0 in Füehrig gange, hets aber mehrmaus verpasst die uszboue. Im Mittudrittu het de dr SCUI mit 3 Gou für d’Vorentscheidig gsorgt. Am Chrigu sis Gou zum 2:4 ir 59. Minute isch de fürne Reaktion vom SC Lyss z’spät cho. Schlussstand SC Lyss - SCUI 2:5.
23.01.2010 Lyss verlürt gäg Wiki mit 1:3
Die 10-tägigi Pouse het am SC Lyss nid guet ta. Im Heimspiu het nach dr 1:0 Füehrig nüm viu zämepasst und d’Lysser hei sich mit viu Strafe und viune ussglane Überzauspiu säuber i Bedrängnis bracht. Wiki het de im Schlussdrittu ds Spiu entschiede.
13.01.2010 Ernöiti Niederlag in Huttwiu
Wi scho ir Qualifikation isch d’Vorentscheidig z’Huttwiu bereits im erschte Drittu gfaue. Huttwiu isch mitere 3:0 Füehrig id Pouse. Lyss isch de im Mittuabschnitt besser ids Spiu cho und het uf 3:2 chönne verchürze. (Chrigu 1 Assist). Churz nachem Aschlussträffer het de aber Huttwiu uf 4:2 erhöht. Ds letschte Drittu isch de 1:1 usgange u so het Huttwiu mit däm 5:3 Sieg d’Lysser wider um drü Punkt chönne distanziere.
09.01.2010 Lyss gwinnt ou ds zwöite Spiu
Bereits ir 4. Minute isch dr Gast us Burgdorf i Füehrig gange. Lyss het sich schwär ta aber dr Chrigu het ir 10. Minute chönne usgliche. Lyss het de bis uf 3:1 chönne wägzieh. 12 Minute vor Schluss isch de Burgdorf no dr Aschlussträffer glunge. D’Lysser hei aber di hektischi Schlussphase ohni witere Gägeträffer überstange und so mit 3:2 gwunne
06.01.2010 Startsieg i dr Masterround
Dr SC Lyss isch erfougrich i ds nöie jahr gstartet. Zwar isch Wiki nachem erschte Drittu mit 2:0 vor gläge, aber im letschte Spiuabschnitt hei d’Lysser ufdräit und am Schluss dütlich mit 8:5 gwunne. Dr Chrigu het mitemne Assist si 21. Skorerpunkt vo dere Saison erziut und het somit scho meh aus ide zwe vorhergehende Spiuzyte bim SCUI.
16.12.2009 Klare Erfoug übere Tabäuenachbar
Mit 8:1 het dr SC Lyss Burgdorf heigschickt. Nachemne früeche Doppupack vom Flöru Jöhl hei d’Lysser z’Spiu nie us dr Hang gä. Dr Chrigu het ir 32. Minute dr Pögg i Netzhimmu ghänkt u mit däm 20. Skorerpunkt siner Saisonergäbnis vode zwöi letschte Saisons egalisiert. Am Schluss het sich de ouno dr Nicu Pfeiffer chönne uszeichne. Är het sis erschte Doppupack ir 1. Liga erziut!!
12.12.2009 4:3 Sieg in Zunzge
Mit 0:0 ischs i di erschti Pouse gange. im zwöite Spiuabschnitt isch auerdings ke Minute gspiut gsi, wo dr Lars Murkowsky sis erschte vo drü Gou het erziut. Im Aschluss si de d’Gaschtgäber mit 2:1 i Füehrig. Die het aber dr Marco Müller churz vor Drittusändi no chönne usgliche. Im Schlussabschnitt isch de Lyss mit 4:2 vore gläge. Zunzge het ersch 18 Sekunde vor Schluss chönne dr Aschlussträffer zum 3:4 schiesse.
05.12.2009 Klari Sach in Adubode
In Adubode het dr SC Lyss nüt la aabrönne. Bereits nachem 1. Drittu isches 0:3 und nachem 2. 0:6 gstange. Am Schluss het Lyss mit 1:7 gwunne u dr Chrigu het sich äs Gou und zwöi Assist chönne la guetschribe.
28.11.2009 Zwöiti Saisonniederlag.
Dr SC Lyss verlürt ou ds zwöite Spiu gäg Huttwiu knapp. nachdäm vili Eigefähler vo zumne 0:4 Rückstand nachem 1. Drittu hei gfüehrt het dr Chrigu mitemne Gou und Assist d’Lysser afangs Mittuabschnitt wider ids Spiu bracht. Vo däm Zytpunkt a hei d’Lysser ds Spiudiktat überno und si eis ums angere mau am gägnerische Goli gschiteret. Am Schluss het Huttwiu mit 5:3 gwunne.
21.11.2009 SC Lyss - Brandis 7:3
Brandis hets am SC Lyss lang nid eifach gmacht u si hinger sehr dicht gstange. Ersch im zwöite Drittu het Lyss uf 4:1 chönne dervozieh. D’Gäscht sie auerdings nomau uf 3:4 härecho, ide letschte 10 Minute het de aber Lyss aues klar gmacht und schlussändlich doch no klar mit 7:3 gwunne. Nächscht Samschtig trifft de dr Chrigu u sis Team zum zwöite mau gäge de verluschtpunktfreie Huttwiu a.
18.11.2009 Witers Stängeli für Lyss
Im Uswärtsspiu z’Thun isch dr Chrigu mitem SC Lyss uf weni Gägewehr gstossä. Grad mit 12:0 hei d’Seeländer imäne witere Duell gäg z’Oberland gwunne. Dr Chrigu het näbemne Assist ou no 2 Strafe wäg Behinderig gha.
15.11.2009
Unger däm Motto het dr Chrigu nachem Spiu SC Lyss - SCUI beid Mannschafte zum z’Nacht iglade. Rund 30 Lüt hei sich de vo Schwienswürschtli, Salat u Dessärt la verwöhne. Für di richtigi Musig hei de d’DJ’s Sticki-G und Pamir gsorget. Biuder
14.11.2009 Chrigu gwinnt gäg ds Oberland
Dr SC Lyss gwinnt ou ds zwöite Duell gägä SCUI. Im erschte Drittu isch ds Spiu usgliche gsi u dr SC Lyss isch mitere 3:2 Füehrig id Pouse. Dr zwöit Spiuabschnitt het de Lyss dominiert u isch mit 6:3 ids Schlussdrittu. Dört heis de d’Oberländer mit 2 schnäue Gou nomau spannend gmacht. Ds 7:5 churz druf isch de d’Entscheidig gsi.
11.11.2009 Witere Sieg füre Chrigu
Ou in Aarou isch dr SC Lyss aus Sieger vom Isch. Zwar hets lang nid derna usgseh, isch doch dr Gastgäber nachem 1. Drittu 2:0 i Füehrig gsi. Dr Chrigu het de dr Aschlussträffer zum 2:1 erziut und im Powerplay äs Assist zum Usglich bigstüret. Zwöi witeri Träffer im Mittuabschnitt hei de zumne 2:4 Lysser Vorsprung gfüehrt. Im Schlussdrittu het Aarou no chönne ds 3:4 erziele, zu meh hets de nümm glängt. Am Samschtig trifft dr Chrigu ir Seelandhaue uf siner ex Mannschatskollege vom SCUI.
08.11.2009 Dütliche Sieg gäg Wiki
Dr SC Lyss het gägä Wiki klar mit 6:1 gwunne. Nachem 1. Drittu ischs no 0:0 gstange. Wiki isch de ir 23. Minute i Füehrig gange, was d’Lysser aber drü Minute später hei chönne usgliche. Dr Chrigu het de i Ungerzau uf 2:1 chönne erhöhe und bi doppleter Überzau het de Lyss mit zwe Träffer d’Entscheidig herbigfüehrt.
03.11.09 BZ-Bricht über Chrigu’s Rückkehr
Ir BZ vo geschter isch ä witere Bricht über Chrigu si Rückkehr zum SC Lyss drin gsi. Link
31.10.2009 Ernöite Assistpunkt füre Chrigu
Dr SC Lyss het sich gägä Zunzge lang schwär ta. Ir 10. Minute het de dr Chrigu mitemne Pass ds 1:0 igleitet. När ischs ä haub Stung gange bis d’Lysser hei chönne uf 2:0 erhöhe. Zwüsche dr 48. u 51. Minute het de dr Jan Krebs mitemne Hattrick für d’Entscheidig gsorgt.
29.10.2009 Burgdorf - SC Lyss 0:5
Nid meh u nid weniger aus ä minimale Pflichtsieg hets füre Chrigu z’Burgdorf gä.
24.10.2009 Diskussionslose Sieg über Adubode
Gäg ds Schlussliecht Adubode het sich dr SC Lyss keni Blössi gä und het klar und dütlich mit 10:0 gwunne. Dr Chrigu het sich ou hie chönne äs Assist guetschribe.
22.10.2009 Klare Uswärtssieg für Lyss
Ds Zuchwil het dr Chrigu mit sim Team klar mit 6:3 gwunne. Scho nachem 1. Drittu het Lyss mit 2:0 gfüehrt. Dr Chrigu het äs Gou und ä Pass bigstüret.
18.10.2009 Knappi Niederlag gäge Gruppefavorit
Dr SC Lyss het ds Spiu gäge di ufstiegsambitionierte Huttwiu Falcons usgliche chönne gstaute. Ersch churz vor Schluss hei 2 Gou is lääre Ghüs ds Spiu ändgüutig entschide.
07.10.2009 Erfougriche Abä fürä Chrigu u SC Lyss
Mit vier Skorerpünkt het dr Chrigu massgäbend am Lysser Erfoug Teil gha. Ir 7. Minute het är ds Skore zum 1:0 eröffnet. Mit dä Päss zum 2:0, 4:1 u 5:1 het är si erfougrich Abä gchrönt. Dr SC Lyss het jitz 10 Tag spiufrei u trifft de am Samschtig 17.10.09 im Spitzekampf uf d’Huttwil Falcons.
04.10.2009 5:0 Uswärtssieg bi Brandis
Dr SC Lyss het ou sis dritte Saisonspiu erfougrich beändet. Ä nie gfährdete 5:0 Sieg i däm dr Chrigu ä Shorthander zur 4:0 Füehrig het erziut.
30.09.2009 Lyss gwinnt gäg Aarau 5:3
Im erschte Heimspiu isch dr Chrigu zu sim erschte Gou cho. Uf Zuespiu vom Thömu Kläy het är ds vorentscheidende 4:3 für Lyss erziut.
26.09.2009 Sieg im erschte Saisonspiu
Im erschte Spiu vor nöiä Saison het dr SC Lyss uswärts bim SCUI 4:3 n.V. gwunne. Am Chrigu sis vorentscheidende 4:2 isch wägemne vorusgangnigä Stockschlag annuliert worde. Nachem Spiu ischer de aber sowohl vode SCUI wi ou vode Lyss-Fans verabschidet worde. Video / Biuder 09/10
25.09.2009 Saisonstart im Bödeli
Nach 8 Vorbereitigsspiu (3 Sieg / 5 Niederlage) geit am Samschti füre Chrigu und SC Lyss die nöji Saison los. Bereits i denä Spiu het dr Chrigu mit diverse Gou u Assist bewise, das mit ihm die Saison z’rächne isch. Dr SC Lyss startet uswärts im Bödeli gägä SCUI, wo dr Chrigu di letschte 7 Jahr gspiut het. Läset hie was im Bieler Tagblatt vo hüt isch gstange.
18.03.2009 BÄCK TU DÄ RUUTZ
NACH SIBÄ SAISONS BIM SCUI DRÄI IG MIT WEHMUET AM OBERLAND DR RÜGGE ZUE. DR ZITLICH UFWAND WIRD MIT DÄ VILÄ OUTOFAHRTE IZ OBERLAND Z’GROSS. DA IG ABER WITERHIN WOT 1. LIGA HOCKEY SPILE, HANI MI ENTSCHIEDE AB DR SAISON 2009/2010 WIDER BI MIM STAMMVEREIN SC LYSS Z’SPILE. FÜR DI WUNDER- SCHÖNI, UNVERGÄSSLICHI U EINMALIGI ZYT BIM SCUI WET IG MI BI AUNE BEDANKE.
Ä LIEBE GRUESS VOM CHRIGU
06.03.2009 Saisonändi füre Chrigu
Dr SCUI verlürt z’entscheidende Spiu gäg Napf mit 3:4. Somit scheidet dr Chrigu im Haubfinau vode Playoff us. Z’Spiu het eigentlich guet agfange für SCUI. Bereits nach 8 Minute hei d’Oberländer mit 2:0 gfüehrt. No vor dr Pouse hei de d’gaschtgäber auerdings usgliche. Im zwöite Drittu het de widerum dr SCUI chönne vorlege. Auerdings het Napf churz vor dr zwöite Pouse z 3:3 gschosse. Im letschte Drittu het de dr Schiedsrichter äs regulärs Gou vom SCUI nid gä, dr Sam Suter het 2 Minute vor Schluss ä Penouty verschosse und zu auem zuche hei d’Gaschtgäber 45 Sekunde vor Schluss usem nüt use dr Siegesträffer erziut.
04.03.2009 Ernöite Usglich ir Serie
Zum zwöitemau cha dr SCUI d’Serie usgliche. Mitere überzügende Leischtig gwinnt z’Team vom Chrigu mit 4:2. Jitz chunnts am Donnschtig z’Huttu zum Showdown. Hopp SCUI!!!
01.03.2009 Niederlag z’Huttwiu
Dr EHC Napf geit ir Serie 2:1 i Füehrig. 7 verschlafni SCUI Minute zum Afang vom Spiu hei Napf glängt um vorentscheidend mit 4:0 i Füehrig zga. Zwar hei sich d’Oberländer bis zum 3:4 härekämpft, aber am Schluss trotzdäm mit 4:6 verlore. Dr Chrigu het widerum äs Assist bigstüret.
25.02.2009 Wichtige Heimsieg
D’Reaktion vom SCUI isch cho!! Im Heimspiu hei d’Ober - länder d’Serie chönne zum 1:1 usgliche. Zur wichtige 2:0 Füehrig düre Luki Suter, ir letschte Minute vor dr zwöite Pouse het dr Chrigu z’Zuespiu gä. Am Samschtig chunnt z’Huttwiu zum dritte Duell zwüschem Ufstiegsaspirant Napf und em SCUI.
22.02.2009 Napf geit i Füehrig
Dr Start id Playoff Haubfinau isch am Chrigu nid glückt. Im erschte Spiu hets ä dütlichi 2:7 Niederlag gä. Obwou dr SCUI langi Zyt het chönne mithaute, het Napf im letschte Drittu aus klar gmacht.
18.02.2009 Chrigu mitem SCUI im Haubfinau
Im vierte Spiu vor Serie het dr SCUI dr Sack zueta. Zwar isch Aaaou 10 Minute vor Schluss no mit 2:0 i Füehrig gsi, aber dr SCUI het innert 91 Sekunde dür von Allmen u Chrigu chönne usgliche. Ir Verlängerig het de dr Vogel aus klar gmacht. Im Haubfinau täffe d’Oberländer abem Samschtig uf Napf.
14.02.2009 Dr SCUI ligt wider vorne
Mitemne 5:3 Heimsieg isch dr SCUI ir Serie mit 2:1 i Füehrig gange. Dr Chrigu het ä Pass zum zwüschezytliche 2:2 bitreit. Am Zieschtig wird de z’vierte Spiu in Aarou stattfinde.
11.02.2009 Aarou glicht us
Ou im zwöite Playoffspiu isch dr SCUI guet gstartet. Auerdings hetmä di spilerischei Überlägeheit nid chönnne i Gou umsetze. So isch de Aarou bis zur Spiuhäufti nach drü Powerplaygou mit 3:0 vor gläge. D’Oberländer hei zaurichi Überzauspiu (ou doppleti) nid chönne usnütze. Dr Chrigu het de ir 45. Minute füre Aschlussträffer gsorgt u ir 53. Minute het Ingold no zum 3:2 verchürzt. Für meh hets de nüm glängt u so steits 1:1 nach zwöi Spiu.
08.02.2009 SCUI geit 1:0 i Füehrig
Dr SCUI gwinnt z’erschte Viertufinauspiu gäg Aarou kler mit 6:2. Scho nachem erschte Drittu hei d’Oberländer mit 3:0 gfüehrt. Am Schluss ischs de 6:2 gstange u dr Chrigu het 1 Assist bigstüret.
31.01.2009 Schwachi 5 Minute
Im letschte masterroundspiu verlürt dr SCUI gäg Napf mit 1:5. D’Füehrig vodä Gescht het Unterseen no im erschte Drittu chönne usgliche. Zwüsche dr 24. u 29. Minute het Napf aber vier Träffer erziut und z’Spiu so früeh entschide. Ide Playoff trifft dr SCUI jitz wi vor 2 Jahr uf Aarou.
24.01.2009 Klare Sieg gäg Lyss
Dr SCUI schlat dr SC Lyss klar mit 8:2. Di erschte 10 Minute si rächt usgliche gsi und beidi Mannschaft hätte Müglichkeite zum Füehrigsträffer gha. Denn het auerding dr Chrigu z 1:0 igleitet u dr Bann isch broche gsi. Bis zur Pouse isches 4:0 gstange und d’Linie vom Chrigu isch bi drü Gou ufem Isch gsi. D’Entscheidig isch de bereits ide erschte 5 Minute vom Mittudrittu cho, indäm dr SCUI uf 6:0 het chönne erhöhe. Am Schluss isches de 8:2 gsi und dr SCUI cha mitemne Sieg im letschte Spiu gäg Napf dr zwöi Tabäurang sichere.
21.01.2009 Knappi Niederlag in Wichtrach
Früeh isch dr SCUI gäg Wiki mit 0:2 i Rückstand gsi. Bis Spiuhäufte hei de d’Oberländer chönne usgliche. Ä ernöiti Wiki Füehrig isch de vom Luki Suter wider egalisiert worde. Ir 58. Minute het de widerum dr Luki Suter ä fragwürdigi Straf übercho. Die Überzausituation het Wiki zum entscheidende 4:3 chönne usnütze. Mit dere Niederlag isch am Chrigu sis Team ufe 4. Tabäuärang abgrütscht. Am Samschtig chunnt de dr SC Lyss uf Matte. Denn wird sicher ou dr Chrigu wider skore ;-)
18.01.2009 Ernöiti Niederlag in Aarou
Dr SCUI het wiedermau z’Aarou verlore. Ä 0:1 Rückstand hets Team vom Chrigu zwe Minute vor Schluss no chönne usgliche. Ir Verlängerig het dr Gaschtgäber auerdings z’Siegesgou erziut.
12.01.2009 Sieg im erschte Masterroundspiu
Dr SCUI gwinnt sis erschte Spiu ir Masterround mit 4:3 nach Verlängerig. Zwar het Zuchwiu ä 2:0 Füehrig vo Unterseen nachem erschte Drittu chönne ine 3:2 Vorsprung umwandle, aber am Usglich ir 47. Minute het dr SCUI nume grad knapp nachäre Minute ir Verlängerig z’Gou zum Sieg la fouge. Dr Chrigu het mitemne Troumzuespiu ufe Swen Kohler dr Pass zum 1:0 bigstüret.
23.12.2008 SCUI verspielt Qualisieg
Di zwe Siege wo dr SCUI ide letschte zwöi Spiu hät brucht füre Wintermeischter si nid zstang cho. Im Uswärtsspiu z’Burgdorf verlüre d’Oberländer dütlich mit 2:6. Im Heimspiu gäg Aarau het de dr SCUI nomau chönne Punkte und sich mitem 6:4 Erfoug dr 2. Rang gsicheret. Dr Chrigu het mitem Träffer zum 3:1 si 13. Skorerpunkt erziut.
15.12.2008 Trotz Niederlag witer Leader
Dr SCUI wahrt sich d’Chance ufä Qualisieg. Zwar hei d’Oberländer z’Wichtrach mit 2:3 verlore, blibe aber no 1 Punkt vor Wiki. Lang hets nachemne Sieg füre SCUI usgseh. Ersch ir 58. Minute het Wiki chönne zum 2:2 usgliche. Im Penoutyschiesse hez de ke SCUI-Spiler (inkl. Chrigu) zstang bracht dr Pögg näbem Wiki Goli dürezbringe. Ide zwöi verblibende Spiu in Burgdorf und däheim gäg Aarau hets am Chrigu sis Team jitz ide eigetä Häng dr Qualisieg is trochne zfahre.
10.12.2008 Rotblau - SCUI 2:6
Im dritte Alouf hets auso doch no klappet. Nach Näbu u Schnee Abbrüch z’Bümpliz isch z’Uswärtsspiu gägä Rot Blau Bärn zum Heimspiu worde. Dr SCUI schlat d’Bärner z’Matte klar mit 6:2
06.12.2008 Sieg gäg Zuchwiu
Dr SCUI gwinnt ou z’zwöite Spiu gäg Zuchwiu. Z’Matte hei d’Oberländer mit 3:1 gwunne.
03.12.2008 SCUI verlürt z’Lyss
Im Uswärtsspiu bim SC Lyss verlürt dr SCUI mit 1:4. D’Oberländer hei nume grad im erschte Drittu chönne akzänte setze, heis aber verpasst di guete Chance z’nütze.
29.11.2008 Sieg im Spitzekampf
Dr SCUI gwinnt dr Spitzekampf gäg Napf mit 4:3 nach Verlängerig. Dr Spiuverlouf het zersch gar nid füre SCUI gsproche. Z’Team vom Chrigu isch dr ganz Match amne Rückstand nachegloffe. U wo Napf ir 46. Minute ds 3:1 het gschosse isch z’Spiu scho fasch entschide gsi. Ä Doppuschlag ir 55. u 57 Minute het de dr SCUI aber id Verlängerig bracht, wo dr Simon Ingold nach 2:16 für d’Entscheidig het gsorgt.
25.11.2008 SCUI erstmaus ohni Punkt
Zum erschte mau i derä Saison geit dr SCUI ohni Pünkt vom Isch. Im Uswärtsspiu z’Zunzge het bide Oberländer nid viu zämepasst. Dr Gastgäber sinersits het de ds maximum us sine Chance useghout.
22.11.2008 Uswärtssieg in Thun
Dr SCUI isch witerhin uf Qualisiegkurs. Uswärts in Thun hets für dOberländer ä knappe 3:1 Erfoug gä. Da di diräkte Verfouger Lyss und Napf hei Pünkt gla, isch Unterseen wider mit 3 Zähler u eim Spiu weniger ar Tabäuäspitzi.
20.11.2008 5:1 Heimsieg gäg Rot Blau
Nachem verschobene Hispiu in Bärn isch dr SCUI die Saison zum erschte mau uf Rot Blau troffe. Vor nume grad 352 Zueschouer hets am Schluss ä 5:1 Pflichtsieg für d’Oberländer gä.
17.11.2008 Witeri 3 Pünkt füre SCUI
Nachem glungnige Rückrundistart gäg Adubode gwinnt dr SCUI ou z’schwäre Uswärtsspiu gäg Brandis. Nachere früeche Füehrig vom Kohler Swen wo dr Chrigu het z’Zuespiu gä het de dr EHC Brandis ir 52. Minute chönne dr Usglich erziele. Di letschte Minute het de dr SCUI so drückt das am Hügu 2 Minute vor Schluss dr Siegträffer isch glunge.
13.11.2008 Chrigu mit 3 Skorerpünkt
Dr Chrigu het widermau zuegschlage. Nach däm dr SCUI deheim gäg Adubode scho nach 6 Minute mit 0:2 i Rückstand isch gsi, heisi im zwöite Drittu z’Spiu chönne chehre. Mit 4:2 ischs de ids Schlussdrittu und am Schluss het dr SCUI mit 6:2 gwunne. Dr Chrigu het 1 Gou und 2 Assist bigstüret. Statistik Chrigu
10.11.2008 Erschit Niederlag füre SCUI
Dr SCUI het di erschti Niederlag müesse entgägenäh. Zwar hets gäg Wiki lang guet usgseh u dr SCUI het sogar bis 7 Sekunde vor Schluss gfüehrt. Nachem Usglich het sich de Wiki im Penoutyschiesse düregsetzt.
02.11.2008 SCUI witerhin ungschlage
Ou im nünte Saisonspiu isch dr SCUI aus Sieger vom Isch. Uswärts bi Aarou het dr SCUI nachemne 0:1 Rückstand überläge mit 4:1 gwunne. Damit blibe d’Oberländer witerhin z’einzige Team ohni Niederlag u fürhe d’Tabäue nach Verlustpünkt mit 5 Zähler a.
25.10.2008 SCUI Leader
Dr SCUI isch nöiä Leader vor Gruppe 2. Mitere Ufhoujagd im letschte Drittu, hei d’Oberländer ä 2:4 Rückstand ine 6:4 Erfoug chönne umwandle. Damit het dr SCUI d’Tabäuefüehrig überno und isch z’einzige Team wo die Saison no ohni Niederlag dasteit. Dr Chrigu het sich mitemne Assist ir Skorerwärtig chönne vermerke.
23.10.2008 SCUI witer uf Erfougskurs
Im Spitzekampf het dr SCUI gäg Lyss knapp mit 2:1 gwunne. Nachemne 0:1 Rückstand im erschte Drittu, het dr SCUI innert erä Minute chönne i Füehrig ga. Im Schlussdrittu hets de dr Chrigu und ou angeri Spiler mehrmaus verpasst, z’Spiu vorzitig z’entscheide.
19.10.2008 Uswärtssieg bim Leader
Ou bim Leader isch dr SCUI aus Sieger vom Isch. In Huttwiu hei sich dOberländer im Penoutyschiessä düregsetzt. Dr Chrigu het zur zwüschezytliche 2:1 Füehrig sis 2. Saison- assist gä. Nachemne ständige Füehrigswächsu isch de ou ihn gsi, wo dr entscheidend Penouty het chönne verwärte. Mit 6 Skorerpünkt füehrt är jitz dSCUI Skorerwärtig a.
12.10.2008 SCUI witer ungschlage
Dr SCUI het sis Heimspiu gäg Thun vor 691 Zueschouer mit 4:1 gwunne u blibt die Saison witerhin ungschlage.
05.10.2008 SCUI gwinnt ou im dritte Spiu
Im Heimspiu gäg Thun het dr SCUI siner nächschte 3 Pünkt chönne iz trochene bringe. Nachemne usglichne erschte Drittu het dr SCUI im Mittuabschnitt mit 2.+ für sich entschiede. Am Schluss hetme de mit 4:1 chönne gwinne.
02.10.2008 3 Skorerpünkt in Adubode
Z’Adubode het sich dr SCUI schwär ta. Ersch ir Verlängerig hei sich d’Gescht chönne düresetze. Ir 65. Minute het dr Swen Kohler dr Siegesträffer chönne erziele. Dr Chrigu het siner erschte zwöi Gou und äs Assist bigstüret.
27.09.2008 Erfougriche Saisonstart
Dr SCUI isch erfougrich idi nöji Saison gstartet. Im Heimspiu gäg Brandis het sich dr SCUI mit 4:1 düregsetzt.
23.09.2008 Torerfoug im letschte Testspiu
Im letschte Vorbereitigsspiu vor nöie Saison het dr Chrigu gäg Düdinge zur 2:1 Füehrig troffe. Am Schluss het dr SCUI mit 5:1 gwunne.
10.09.2008 Usglichne Saisonstart
Dr Chrigu isch mitem SCUI usglich i di nöji Saison gstartet. Nachemne Unentschide z’Winterthur u zwe Niederlage in Visp u Zuchwiu, het dr SCUI in Sion und Dübendorf aus Sieger vom Isch chönne. Äs blibe jitz no vier Vorbereitigsspiu, bevors de am Samschtig, 27.09.2008 z’Matte gäge Brandis mit dr nöje Meisterschaft losgeit.
Summerpouse
31.03.2008 Chrigu blibt “Oberländer”
Dr Chrigu spiut ou ir nächschte Saison bim SC Unterseen - Interlake. Är het fürnes witers Jahr bide Oberländer ungerschribe.
03.03.2008 Saisonändi fürä Chrigu
Z’Dritte Finauspiu isch äs Äbebiud vom erschte gsi. Wider isch dr SCUI besser gstartet u isch mit 2 Gou i Füehrig. Zuchwiu het de z’Blatt aber gwändet u isch mit 3:2 vore gläge. Bereits drü Minute vor Schluss het dr Sigi z’Gou verla u amne sächste Fäudspiler Platz gmacht. Nach paar Fäuschüss vode Gascht- gäber ufs lääre Gou het dr SCUI doch no dr Usglich gschosse. Ir Verlängerig hei de d’Zuchwiler mitemne Buebetrickli d’Saison vom SCUI beändet. Spiubricht
27.02.2008 SCUI mitem Rügge zur Wand
Ou im zwöite Spiu het dr SCUI gäg Zuchwiu ke Sieg chönne i z’trochene bringe. Z’viu Eigefähler und Abschlusspäch hei nid glängt um d’Serie uszgliche. Spiubricht
23.02.2008 SCUI verschänkt Sieg
Im erschte Finauschpiu het dr SCUI d’Füehrig ir Serie verspiut. Ä 3:1 Vorsprung hei d’Oberländer nid chönne verwaute u z’Spiu mit 4:3 verlore. Am Zieschtig findet z’Matte z’zwöite Spiu statt. Spiubricht
16.02.2008 SCUI nach 5:3 Sieg über Napf im Finau
Nach drü Jahr steit dr SCUI wieder im Playoff-Finau vor Gruppe 2. D’Oberländer hei gäg Napf nümme la abrönne usech ufem chürzischte Wäg düregsetzt. Am Samschtig geits de uswärts los. Dr Gägner isch Lyss oder Zuchwil. Spiubricht
14.02.2008 SCUI gwinnt ou dr zwöit Haubfinau
Ou im zwöite Haubfinauspiu gäg Napf ischs ä knappi Aglägeheit gsi. Dr SCUI het zwöimau chönne ä Rückstand usgliche (2:2 Chrigu), bevor si mit 3:2 i Füehrig si. 17 Sekunde vor Schluss het de Napf aber bi 6 gäg 4 Fäudspieler chönne dr Usglich erzielä. D’Verlängerig hei de d’Oberländer dominiert, auerdings het ou dr Gascht no siner Torchance gha. Ir 75. Minute het de dr Grossniklous i Ungerzau für d’Enscheidig gsorgt. Spiubricht
12.02.2008 Uswärtssieg im erschte Haubfinauspiu
Dr SCUI het sis erschte Haubfinauspiu z’Huttwiu gäg Napf mit 3:2 gwunne. Mittere 1:0 Füehrig isch dr SCUI i di erschi Pouse. Z’Heimteam het de im zwöite Drittu z’Spiu kehrt und het nachem zwöite Spiuabschnitt 2:1 gfüehrt. Ä Doppuschlag innert 32 Sekunde het de zur Entscheidig füre SCUI gfühert. Napf het ide letschte 10 Minute füf Überzauspiu nid chönne zum Usglich nütze. Spiubricht
29.01.2008 SCUI im Playoff Haubfinau
Mitemne klare 8:5 Sieg im dritte Spiu vode Viertufinau het sich dr SCUI gägä Wiki mit 3:0 düregsetzt. Für einisch hei die zwe Goalies nid ihre bescht Tag verwütscht. Dr Chrigu het mit zwöi Assists ufe Swen Kohler si Teu zum Erfoug bitreit. Spiubricht
26.01.2008 2. Sieg gäg Wiki
Dr SCUI gwinnt ou z’zwöite Playoff-Viertufinauspiu gäg Wiki mit 1:0. Somit lige dOberländer ir Serie 2:0 vore u hei am Zie- schtig dr erscht Matschpögg füre Izug id Haubfinau. Spiubricht
20.01.2008 Sieg und Heimvorteil füre SCUI
Dr SCUI gwinnt sis letschte Masterroundspiu uswärts in Zuchwil mit 3:0. Somit träffe d’Oberländer ide Playoff 1/4-Finau uf Wiki. D’Serie startet mitem Heimspiu für Unterseen am nächschte Donnschtig, 24. Januar.
17.01.2008 SCUI gwinnt gäg Lyss 5:2
Dr SCUI gwinnt gägä Leader us Lyss verdient mit 5:2. Dr Chrigu het a sim Geburi dr zwöit Träffer für dOberländer chönne erziele. Am Samschtig wird jitz entschiede wär dr Gägner ide Playoff-Viertufinau wird.
14.01.2008 Erschte Sieg ir Masterround
Nach zwe Niederlage zu Beginn vor Masterround gäg Wiki u Napf, het dr SCUI dr erscht Sieg igfahre. Im Heimspiu gäg Zunzge gwinne d’Oberländer mit 5:2. Am Mittwuch begrüesst dr SCUI im Heimspiu dr SC Lyss. Dr Chrigu wird a sim Geburtstag aus probiere, um wiedermau ä Sieg gäg si Ex-Klub z’erkämpfe
27.12.2007 Dritte Rang nach dr Quali füre SCUI
Dr SCUI beändet d’Qualifikation ufem dritte Platz. Damit hei d’Oberländer ir Masterround drü Heim- u zwöi Uswärtsspiu. Am 28. Dezember findet in Matten z’aujährliche Energy on Ice statt. Dr Chrigu trifft dert uf z’NLA Team vode ZSC Lions. Details chöit dir am Matchprogramm entnäh.
01.12.2007 1:5 Niederlag in Lyss
Ou im zwöite Spiu gäg Lyss het dr SCUI und dr Chrigu nid chönne punkte. Zwar isch zSpiu usgliche gsi, aber die vile Strafe hei de Oberländer eis ums angere mau dr Rhythmus broche. U wesi de mau chlei am drücker wär gsi isch im SC Lyss Gou dr Remo Hirschi ä sichere Rüchhaut gsi.
29.11.2007 Zwöit 4:0 Sieg innert 5 Tag
Im Verfougerduell het sich dr SCUI gägä Napf mit 4:0 düregsetzt. Dr Chrigu het dr Träffer zum 2:0 erziut.
25.11.2007 Zu Null Sieg in Thun
Dr SCUI hetsech gäg Thun gfange. Zwar hei si etlichi Chance ussgla, aber dr 4:0 Usswärtserfoug isch nie i Gfahr gsi. Nachem Pass zum 1:0 und am säuber erziute 2:0 isch z’Spiu füre Chrigu ir 47. Minute beändet gsi. Ä hohe Stock vomne Thuner het ihn ar Nase breicht u är het die mit 6 Näht müesse la zämeflicke. Für di nächschte Spiu isch är aber wider Fit.
22.11.2007 Playoff 2007 lö grüesse
Wi scho ide letschte Playoff het dr SCUI dr Gägner us Aarau nid im Griff gha. Zwar si dOberländer 1:0 und 3:2 i Füehrig gsi, aber ir verlängerig hei 15 Sekunde zum Penoutyschiesse gfäut. Dr Chrigu het zGou zum 1:0 erziut
19.11.2007 Knappe Sieg z’Burgdorf
Eis einzigs Gou het am SCUI in Burgdorf glängt um die drü Pünkt Hei znäh. Am Mittwuch träffe d’Oberländer z’Matte ufe letschtjährig Playoff-Schreck Aarau.
10.11.2007 Dr SCUI verlürt ir Verlängerig
Dr SCUI het wider zwe Pünkt verschänkt. Im Uswärtsspiu gäg Zunzge-Sissach het dä Oberländer ä 7:4 Füehrig euf Minute vor Schluss nid glängt um di drü Pünkt z’sichere. Nach 4:21 Minute ir Verlängerig hei d’Gaschtgäber dr Siegesträffer erziut.
06.11.2007 Rot-Blau Bern - SCUI 4:5 n.V.
Im Nachtragspiu gäg Rot Blau het dr Chrigu nach zwöi- maligem Rückstand dr SCUI mit 3:2 i Füehrig gschosse. 21 Sekunde vor Schluss het de Rot Blau ä 3:4 Rückstand usgliche. Nach nume grad 1 Minute het de dr Koller Tomy für d’Entscheidig gsorgt und am SCUI dr zwöit Punkt grettet.
04.11.2007 Sieg gäg Wiki Münsinge
Dr SCUI schlat vor 1138 Zueschouer Wiki Münsinge mit 5:4. Imene hochstehende Spiu het dr SCUI verdient di drü Pünkt im Oberland bhaute.
27.10.2007 SCUI schlat Brandis mit 7:2
Nach drei Niederlage fingt dr SCUI zrügg zum siege. Gäg Brandis hei d’Oberländer keni grössere Problem gha und dütlich gwunne.
25.10.2007 Dr SCUI verlürt gägä Leader
Ou in Zuchwiu het dr SCUI keni Pünkt chönne ergattere. Zwar ischme nachemne Startfurioso bereits früeh i Füehrig gange, het aber innert churzer Zyt müesse z’1:1 und 1:2 hinäh. Vo da a isch bide Oberländer nüm viu gange. Wi ide vorhärige Mätsche, het ou Zuchwiu siner Chance besser usgnützt.
21.10.2007 Zwöiti Niederlag i Serie nach drei Siege
Rächtzytig zum erschte Eicherderby gäge SC Lyss isch ou d’ Homepage wider mau chlei aktualisiert worde. Dr SCUI isch mit dreine Siege i di nöji Saison gstartet. Nachdäm d’Ober- länder am vergangene Zieschtig gäg Napf di erschti Niederlag hei müesse hinäh, hetmä gäg Lyss jitz ou deheim zum erschte mau aus Verlürer vom Isch müesse. Dr SCUI isch über z’ganze Spiu mite Lysser äbebürtig gsi. Jedoch hei d’Seeländer di vielä unnötige Strafe chautblüetiger usgnützt aus dr SCUI siner Überzausituatione. Am Mittwuch tritt dr Chrigu mit sire Mannschaft uswärts bim Leader in Zuchwiu a.
04.05.2007 Chrigu ou ir nächschte Saison bim SCUI
Ou ir nächschte Saison wird dr Chrigu für dOberländer uf Punktejagd ga. D Mannschaft blibt gröschteteus zäme. Einzig dr Däni Inäbnit wo ufhört u dr Martin Kilchör wo zu Wiki geit, verlö dInterlakner. Nöie Trainer isch dr Reto Gertschen. Da mitem Michu Rytz ä Spiler us gmeinsame Lysserzyte zum SCUI wächslet cha dr Chrigu jitz ou chlei Bänzin spare.
17.02.2007 Saisonändi füre Chrigu und SCUI
Ou im vierte Playoff-Viertufinauspiu gäg Aarou het dr SCUI kes Rezäpt gfunge um dAargouer i Bedrängnis zbringe. Obwou dOberländer ihres beschtä Playoffspiu hei zeigt, hei si viu zviu unnötig Pöggverluschte gha, wo dr Gägner chautblüetig usgnützt het. Dr SCUI het ä 0:2 Rückstand chönne usgliche, hets aber verpasst, dÜberlägeheit afangs Schlussabschnitt i Gou umzsetze. Ä 3 gäg 5 Situation hei de dAarouer mit 2 Gou souverän usgnützt. Damit scheidet dr SCUI nach sibä Finauteilnahme u äm Haubfinau vo letscht Jahr bereits im Viertufinau us. D´Saison isch damit ou füre Chrigu so früeh fertig wi no nie. Föteli Saison 2006/2007
15.02.2007 Ernöiti Heimniderlag. SCUI - Aarou 2:3
Eifach nume schlächt. Chrigu im Matchprogramm
13.02.2007 z’Heimrächt zrüggerkämpft
Nach 74 nid würklich überzügende Minute gwinnt dr SCUI glücklich mit 4:3. Dr Chrigu het eis “Gou” u eis Assist biigstürt.
10.02.2007 SCUI gäg Aarou 3:4 nach Verlängerig
Ohni Wort.
03.02.2007 Dr SCUI beändet Masterround uf Rang 1
Dr SCUI het z´letschte Masterrroundspiu gäg Zuchwiu mit 6:5 nach Penoutyschiesse gwunne. Somit beände dOberländer die Masterround mit 4 Punkt Vorsprung uf Lyss ufem erschte Platz. Am nächschte Samschtig fö de dPlayoffs a. Dr SCUI trifft uf Aarou.
28.01.2007 SCUI - Napf 3:2
Dr SCUI het uf dNiederlag vo Lyss reagiert u Napf mit 3:2 bezwunge. Da dLysser in Zuchwiu hei verlore übernimmt dr SCUI vor dr letschte Masterroundpartie gäg dSolothurner mit drü Punkt Vorsprung wider dTabäuäfüehrig.
21.01.2007 Dütlichi Niederlag in Lyss
DIm Spitzekampf z´Lyss isch dr SCUI nie iz Spiu cho. Bereits nachem erschte Drittu isch dr SC Lyss mit 3:0 i Füehrig gsi. Am Schluss hei dOberländer mit 2:8 verlore u so dTabäuäfüehrig wider a Lyss abgä. Dr Chrigu het dr Aschlussträffer zum 1:6 erziut u isch zum Beschte SCUI Spiler gwäut worde..
14.01.2007 Klare 5:0 Sieg z´Thun
Dr SCUI gwinnt ou sis z´zwöite Spiu vor Masterround. Dr Chrigu het äs Assist zum 1:0 bigstüret. Am nächschte Samschtig chunnts z´Lyss zum Spitzespiu.
06.01.2007 Start id Masterround glunge
Dr SCUI gwinnt sis erschte Spiu vor Masterround mit 4:2. Zwar isch Wiki mit 1:0 in Füehrig gange, aber im zwöite Drittu het dr SCUI ds Spiu dräit. Dr Chrigu het mit eim Gou u amne Assist sini letschtjährigi Punktestatistik bereits überhout. Div. nöji Fotos
29.12.2006 Dütlichi Niederlag bi “Energy on Ice”
Obwou dr SCUI zytwies mitem Hc Fribourg het chönne mithäbe isch z’Resultat klar usgfaue. Vor 1290 Zueschouer gwinnt dr NLA-Verträter mit 9:2.
23.12.2006 SCUI beändet dQuali ufem zwöite Rang
Mit zwe Siege zum Schluss vor Qualifikation cha dr SCUI dr Aschluss a Leader Lyss bhaute. Im Januar faht de d’Master- Round a, wos um di definitive Platzierige fürd Playoff geit.
13.12.2006 SCUI - Wettinge 8:0
Dr SCUI gwinnt gäg Wettinge klar mit 8:0. Dr Chrigu het zu däm Sieg 2 Assist biigstüret. Da Wiki z`Zuchwiu mit 2:1 het gwunne, ligt dr SCUI jitz 6 Pünkt vor de Solothurner.
09.12.2006 Chrigu mit 2 Gou u 1 Assist gäg Rot-Blau
Mitemne klare 8:0 Uswärtserfoug in Bärn isch dr SCUI wider mit Lyss, wo gäg Napf het velore, glichzogä. Mit drü eriziute Skorer-
pünkt chunnt är sire letschtjährige Bilanz immer nöcher. Sini Verfouger ir Skorerlischte het är grad säuber in Schach. Isch är doch gmäss Luki Suter absichtlich inä Schuss gloffe, wo lut Ussage vom Junior mitz i “Bügel” wär.
06.12.2006 Punktverluscht gäg Burgdorf
Dr SCUI het gäg Burgdorf 1 Punkt abgä. Dr 4:3 Sieg isch ersch
im Penoutyschiessä errunge worde. Dr Chrigu het sini erschti
10 Minute Disziplinarstraf im Dress vode Oberänder müesse abhocke.
02.12.2006 Aarau - SCUI 1:3
Mitemnä knappe 3:1 Sieg in Aarau cha dr SCUI si zwöit Tabäuärang haute. Mit 2 Gou u 1 Assist isch Bühlmann Tinu dr Matchwinner gsi.
01.12.2006 5:3 Sieg gäg Napf
Dr Chrigu het mitem Träffer zum 3:2 si 21igscht Skorerpunkt chönne erzielä. Dank däm 5:3 Sieg blibt dr SCUi am Tabäuä- füehrer Lyss uf dä Färsä.
22.11.2006 Dr SCUI verlürt zSpitzespiu 3:4
Dr SCUI verlürt zLyss zSpitzespiu mit 3:4. Somit übernimmt dr SC Lyss wider dTabäuäfüehrig. Entscheidend isch gsi, dass dr SCUI 2 Gou i Überzau zur 4:2 Füehrig vo Lyss het übercho. Zwar het dr Chrigu no zum 3:4 chönne verchürze, het aber när ei Minute vor Schluss no ä Penouty verschosse.
18.11.2006 SCUI ISCH LEADER
Dr SCUI het dank ämnä klare 7:2 Erfoug über Thun dTabäuä-
spitzi überno. Wüu Lyss in Zuchwil mit 4:6 het verlore, lige jitz dOberländer vorem Spiu in Lyss 1 Punkt vor dä Seeländer. Dr Chrigu het gäg Thun 2 Assist bigstüret und het jitz i 14 Spiu 19 Skorerpünkt erziut.
11.11.2006 Chrigu “Best Player”
Dr Start id Rückrundi isch am SCUI glückt. Gäg Zunzge Sissach hei si ä dütlichä 6:2 Sieg chönne fiere. Ou dr Chrigu isch witerhin guet i Form. Sini Linie het nid weniger aus vier Gou gschosse, wobi är mitemne Sololouf eis grad säuber erziut het. Aus Krönig isch är de no zum beschte Spiler vom Spiu gwäut worde.
08.11.2006 CHRIGU ”MAGISTRAL”
”Eicher brillierte im Spitzenkampf”. So het d Jungfrou-Zitig hüt titlet. Dr SCUI het das Spitzespiu dank ere kämpferische Leischtig mit 4:3 chönne für sich entscheidä. Dr Chrigu het derbi zwöi Gou gschosse u eis Assist verbuechet. Gmäss Zitig
het dr Chrigu ä magistrali Leischtig bottä. Gratulation
08.11.2006 1.Liga Almanach erhältich
Znöiä Buech über dHockeysaison 2006/07 vor 1.Liga chame ab sofort bschteue. Drinn isch aues wüssenswärte über die 36 Klüb. Ou vom SCUI hets paar interessanti Details. Ein muss für jede Fän. Link zun bschteue
07.11.2006 Zwe witeri Siege fürä SCUI
Dr SCUI cha dr Aschluss a d`Tabäuspitzi bhaute. Z`Wettinge hets ä erchnortzte 7:5 Erfoug gä u gägä Wiki hei dOberländer gar iz Penoutyschiesse müesse. Am Mittwuch trifft dr Chrigu mit sim Team uf Zuchwil wo Punktglich mitem SCUI 3 Zähler hingerem Leader Lyss isch. Föteli
29.10.2006 SCUI schlat Rot-Blau Bern klar mit 5:0
Gäg Rot-Blau Bärn het dr SCUI ä witere Sieg chönne ifahre. Dr Favorit het sich klar mit 5:0 düregsetzt..
26.10.2006 Knappe Sieg zBurgdorf.
Dr SCUI cha dr Aschluss ad Spitze haute. In Burgdorf hei dOberländer churz vor Schluss dr 5:4 Siegesträffer chönne erziele. Dr Chrigu het sich mitem 3:1 si zwöit Saisonträffer chönne guetschribe.
22.10.2006 Sichere Sieg gäg Aarau
Am Samschtig isch dr SCUI zumne klare 5:0 Sieg gäg Aarau cho. Mit däm Sieg hetsech dr SCUI ufem zwöite Platz chönne haute.
18.10.2006 SCUI ufem zwöite Tabäuäplatz
Nach dr knappe Niederlag im Spitzespiu gäg Lyss, het sich dr SCUI im Spiu z`Huttwiu wider überne Sieg chönne fröiä. Napf het bir 1:5 Niederlag gäg dOberländer kei Chance gha. Dr Chrigu het ä solidi Partie gschpiut, isch aber ou dür sini 2 Bankstrafe ufgfaue ;-)
08.10.2006 Dritte Sieg i Foug
Nach de zwe Startsiege gäg Zunzge u Brandis het dr SCUI ou z’dritte Meischterschaftsspiu gwunne. Gäg Thun het dr SCUI mit 4:2 gwunne u steit somit verluschtpunktlos mit Aarau u Lyss ar Tabäuäspitzi. Dr Chrigu het sis erschte Saisongou chönne erziele u säch ou no äs Assist chönne guetschribe. Am Mittwuch chunnts jitz z’Matte zum Spitzespiu gäg Lyss. Föteli
17.09.2006 Sieg im 6. Vorbereitigsspiu gäg Sion
Nach drü verlorne u zwöi gwunnene Spiu het dr SCUI zMatte gäg Sion ä ungfährdete Sieg chönne ifahre. Bereits nach 6 Minute isch Unterssen mit 3:0 i Füehrug gsi. r Chrigu het dr Pass zum 2:0 bigschtüret. Nachdäm mä de ä Gang zrügg gschautet het ischs zum Schluss 5:1 usgange.
20.08.2006 Erfougriche Saisonstart füre Chrigu
Dr Chrigu isch guet i di nöji Saison gstartet. Im erschte Fründschaftsspiu het är mitem SCUI uswärts bi Napf mit 5:2 gwunne. Är het derbi ds vorentscheidende 5:1 chönne erzielä.
01.04.2006 Chrigu äs witers Jahr im Oberland
Kei Apriuscherz!! Dr Chrigu het fürnes witers Jahr bim SC Unterseen-Interlake ungerschribe. Nachdäm ou Gspräch mitem SC Lyss stattgfunde hei, isch lang überne Rückkehr its Seeland spekuliert worde.
05.03.2006 Allstar-Game Lyss
Zwe Wuche nachem Usscheide ide Playoff gägä SC Lyss isch dr Chrigu nomau ir Seelandhaue ufem Isch gschtange. Bim aujährliche AllstarGame isch är mit dr Nummere 59(???) aträtä. zAllstar-Game het sini Mannschaft mit 2:4 verlore, wobi dr Chrigu z 1:3 erzieut het. Ou im Penoutyschiesse isch är erfougrich gsi u het dr Christian Zürcher bezwunge. Äs paar Impresione finget dir bide Föteli und Videos.
18.02.2006 SCUI usgschiedä
D’Saison isch fürä Chrigu u fürä SCUI fertig. Im dritte Playoffhaubfinau gwinnt dr SC Lyss mit 3:1. Dr Chrigu isch nach 30 Minute verletzt usgschiede.
14.02.2006 Bricht usem Matchprogramm vom SCUI
DES PENDELNS NOCH NICHT MÜDE GEWORDEN
Für Christoph Eicher birgt die Playoff-Halbfinal-Begegnung zwischen dem SC Lyss eine merkwürdige Ausgangslage. Spielte der SCUI-Stürmer doch seine ganze Juniorenzeit beim SC Lyss und wohnt in Kappelen – drei Minuten von Lyss entfernt.
Als achtjähriger Knabe begann Christoph Eicher seine Eishockeykarriere beim SC Lyss. Bis vor vier Jahren – als er eine Luftveränderung suchte und zum SC Unterseen-Interlaken wechselte. Für den 25-jährigen Stürmer ist die Playoff-Halbfinal-Begegnung mit dem SCUI gegen den SC Lyss etwas ganz Spezielles. «Ich kenne das ganze Umfeld, zahlreiche Zuschauer und noch zwei bis drei aktive Spieler aus der ersten Mannschaft.» Kein Wunder: Christoph Eicher ist drei Autominuten von Lyss entfernt in Kappelen aufgewachsen und hat noch heute seinen Wohnsitz in dieser Seeland-Gemeinde. «Nach dem ersten Halbfinalspiel vom vergangenen Samstag, wurde ich schon von einigen im Dorf auf das Spiel angesprochen.» Negative Kritiken erhielt er allerdings nicht. «Wir haben sachlich über das Spiel diskutiert.»
KV-Angestellter, Landwirt und Hockeyspieler
Christoph Eicher pendelt regelmässig zwischen Kappelen und seinem Arbeitsort Aarberg; zwischen Aarberg und dem Trainingsort Matten und natürlich auch zwischen diesen Orten und dem Wohnort seiner Freundin – Thun – hin und her. «Natürlich ist die Freizeit eingeschränkt», bemerkt er. Regelmässig ist er nicht vor 21.00 Uhr zu Hause. «Es ist alles eine Sache des Einteilens», so der SCUI-Spieler. Vor allem im Sommer wird seine Freizeit noch mehr eingeschränkt: Nachdem vor drei Jahren sein Vater unerwartet verstorben ist, kümmert sich der gelernte Landwirt und kaufmännische Angestellte um den elterlichen Betrieb. «Die Arbeit als Bauer ist ein sehr ausgeprägtes Hobby von mir», bemerkt «der Farmer» lachend, auf seine Hobbys angesprochen. «Bisher hat es mit dem Hof sehr gut geklappt. Im Sommer fehle ich etwas mehr, dafür bin ich im Winter eigentlich zu jedem Training einsatzbereit.»
Eicher verlängert seinen Vertrag
Natürlich wäre die Nationalliga für Christoph Eicher ein Ziel. Während seiner Zeit in Lyss absolvierte er bereits einige Probetrainings mit dem EHC Biel. «Der Schritt wäre gar nicht so gross. Man muss einfach von Anfang an bereit sein dazu und hart arbeiten.» Der 25-Jährige ist jedoch realistisch. «Praktisch ist es für mich momentan gar nicht möglich.» Negativ sieht er dies jedoch nicht. «In Bezug auf die Freude am Sport, fühle ich mich wahrscheinlich sowieso wohler in der 1. Liga als in der Nationalliga.» Wie seine sportliche Zukunft aussieht – wenigstens für die nächste Saison – weiss er bereits. «Ich habe ein Verlängerungsangebot vom SC Unterseen-Interlaken. Es fehlt nur noch meine Unterschrift.» Eicher macht es spannend; wartet einige Sekunden und meint dann: «Ich werde sicher noch eine Saison beim SCUI spielen.» Denn der Stürmer ist des Pendelns noch nicht müde geworden. (ci)
14.02.2006 Ou z’2. Haubfinauspiu geit a SC Lyss
Wi im erschte Spiu, hets dr SCUI ou hüt verpasst, diräkt uf z’Lysser Gou z’schiessä. Ersch im letschte Drittu hei d’Oberländer vehemänt dr Torabschluss gsuecht, u si nöch am Aschlussgou gsi.
11.02.2006 SCUI verlürt z’ 1. Haubfinauspiu mit 3:4
Dr SCUI het z’erschte Spiu ir Haubfinauserie gäg Lyss mit 3:4 verlore. Zwar hetmä viu Chance usegspiut, isch aber immer wider dür Strafe i Ungerzau gsi. Das sehr usglichne Spiu, het mitem SC Lyss die glücklicheri Mannschaft für sich entschiedä.
07.02.2006 SCUI im Haubfinau!!!!
Äs isch gschafft! Dr SCUI steit im Haubfinau. Dank ämnä 4:3 Uswärtserfoug in Sissach hei d’Oberländer die Serie mit 3:1 für sich entschide. Dr Chrigu het siner Skorerqualitäte für ä am Samschtig beginnend Haubfinau gäg Lyss gspart.
04.02.2006 SCUI wider i Füehrig
No ei Sieg u dr SCUI steit im Haubfinau. Im dritte Viertusfinauspiu gwinnt dr SCUI gäg Zunzge mit 3:1. Dä Spiustang isch bereits nach 17 Minute erreicht gsi u im witere Verlouf hei zwe gueti Goli’s drfür gsorgt dases so blibt. Dr SCUI het siner vilä Überzausituationä nid chöne nütze, aber we d’Spiler vo Zunge wider so ufestöh wi am Samschtig wärde si ou im nächschte Spiu mängi Glägäheit ha, z’Powerplay z’üebä. Am Zieschtig geits jitz drum die Serie z’beände um so d’Vorbereitig füre SC Lyss z’starte.
Video vom erschte Spiu gäg Zunzge
31.01.2006 Niederlag im zwöite Playoffspiu
Dr SCUI verlürt z’zwöite Spiu vor Viertusfinauserie gägä Zunzgen-Sissach mit 2:5. Chance hei sich d’Oberländer viu usegschpiut, aber mit dr Uswärtig hets chlei gharzet. Hoffe mir, dasses am Samschtig wieder angers usgseht.
29.01.2006 Dr SCUI gwinnt z’erschte Playoff Spiu
Dr SCUI ligt im Playoff-Viertusfinau gägä Zunzgen mit 1:0 i Füehrig.
Zwar si die mit knaugrüenä Händsche ufloufende Interlakner nie i Rückstang gsi, hei aber am Schluss glich no müesse zittere.
Ou dr Chrigu het si Ateu a däm Sieg gha. Är het i Ungerzau z’2:0 erzieut.
25.01.2006 Nöji Videos online
Ab sofort si nöji, oder äbä auti Videos online. Dir finget die unger Föteli. Äs handlet säch um Brichte wo im Loly, Tele Bärn oder Tele Bilingue si cho.
20.01.2006 Dr SCUI Verlürt gägä SC Lyss
Ou z’letschte Masterroundspiu het dr SCUI verlore. Nachdäm mä zersch 1:0 i Füehrig glägä isch, het sech di mageri Chanceuswärtig am Schluss grächt. Dr SCUI isch somit ufem dritte Tabäuäplatz u startet ide Playoff-Viertusfinau gägä Zunzge-Sissach, wo ihrersits keis einzig Masterroundpunkt hei ghout..
17.01.2006 Niederlag gägä Zuchwiu trotz Eicher-Gou
Im zwöitletschte Spiu vor Masterround het dr SCUI z’Matte gägä Zuchwiu mit 2:4 verlore. Zwar het dr Chrigu i Ungerzau 2:35 vor Schluss z’Aschlussgou zum 2:3 chönne erzielä, meh isch aber nüm dringlägä.Jitz entscheidet sich am Samschtig ir letschte Party gägä Lyss, vo welem Tabäuärang am Chrigu sis Team id Playoff startet.
16.01.2006 Homepageröffnig vom Christoph Eicher
Hüt isches sowit. D’Homepage vo üsem Hockeycrack isch rächtzitig
zu sim 25ste Geburi online.
!!!!HAPPY BIRTHDAY CHRIGU !!!!
Die Websitä söu ä chlinä Iiblick dür d’Hockeykarriere vom aktuellä
Amatörschwizermeischter gä. Biuder u Facts stammä us familiäeigenä
Aubä oder si vor Websitä vom SC Unterseen Interlaken, wo üs
fründlicherwis d’Erloubnis für d’Witerverwändïg vodä Biuder het erteilt.
Merci!!
Jitz wünschä mir viu Vergnüägä bim sörfä
|
